“Risen” (2016) පටන් ගන්නෙ යේසුස්ව කුරුසෙ ගහලා, මරණය තහවුරු කළාට පස්සෙයි. ක්ලේවියස් කියන්නෙ බලවත්, දක්ෂ රෝම හමුදා සෙන්පතියෙක්. මෙයාට තමයි පිලාත් නියෝග කරන්නෙ, යේසුස්ගෙ ගෝලයො ඇවිත් මිනිය හොරෙන් අරන් ගිහින්, “එයා ආයෙ නැගිට්ටා” කියලා කටකතා පතුරවන එක නවත්තන්න කියලා. ඉතින් ක්ලේවියස්, යේසුස්ව තැන්පත් කරපු සොහොනට ලොකු ගලක් පෙරළලා, මුද්‍රා තියලා, මුරකාරයොත් යොදවනවා.

ඒත්, දවස් තුනකට පස්සෙ ලොකු අවුලක් වෙනවා. මුද්‍රා කඩලා, ගල පෙරළලා, සොහොන හිස්! මුරකාරයොත් අතුරුදන්.

නැගිට්ටා කියන කතාව ගිනි අරන් වගේ පැතිරෙන්න ගන්නවා. දැන් ක්ලේවියස්ට තියෙන්නෙ අලුත් මෙහෙයුමක්: කොහොමහරි අතුරුදන් වෙච්ච මළ සිරුර හොයාගන්න එක.

ක්ලේවියස් කියන්නෙ මේ දේවල් පොඩ්ඩක්වත් විශ්වාස නොකරන, තර්කයෙන් වැඩ කරන කෙනෙක්. එයා හිතන්නෙ මේක ගෝලයො කරපු සැලසුම් සහගත වැඩක් කියලා. ඉතින් එයා පටන් ගන්නවා ලොකු විමර්ශනයක්. යේසුස්ගෙ ගෝලයොන්ව දඩයම් කරනවා.

හැබැයි, එයා මේ පරීක්ෂණය කරගෙන යද්දි, එයාට දකින්න ලැබෙන දේවල්, අහන්න ලැබෙන සාක්ෂි එක්ක… ක්ලේවියස්ගෙම විශ්වාසයන් ටිකෙන් ටික දෙදරුම් කන්න පටන් ගන්නවා. ඇත්තටම මොකක්ද වුණේ? එයාට මිනිය හොයාගන්න පුළුවන් වෙයිද? නැත්නම් එයා හොයනවට වඩා හාත්පසින්ම වෙනස් දෙයක්ද එයාට හම්බවෙන්නෙ?