මේක ඇත්තටම හිතට වදින යුද්ධ චිත්‍රපටයක්. මුලින්ම මේක හදපු අය ගැන පොඩ්ඩක් කියන්නම්. මේ චිත්‍රපටය අධ්‍යක්ෂණය කරලා තියෙන්නේ Ryan Little විසින්. ඒ වගේම Corbin Allred (ඩීකන්), Alexander Polinsky (ස්ටීවන්) සහ Kirby Heyborne (ඔබෙරෝන්) වගේ නළු පිරිසක් තමයි මේකේ ප්‍රධාන චරිතවලට පණ දෙන්නේ.

දැන් අපි කතාව පැත්තට හැරෙමු. කතාව පටන් ගන්නේ දෙවෙනි ලෝක යුද්ධයේ දරුණුම කාලෙක, ඒ කියන්නේ 1944 අවුරුද්දේ. බෙල්ජියම්වල හිමෙන් වැහුණු කැලෑවක් මැද සිද්ධ වෙන “Malmedy Massacre” කියන සිද්ධියත් එක්ක තමයි මේක දිගහැරෙන්නේ. ජර්මානු හමුදාවට අහුවෙන ඇමරිකානු සෙබළු කණ්ඩායමක් දරුණු විදියට ඝාතනය වෙනවා. හැබැයි මේ අතරින් වාසනාවට වගේ හතර දෙනෙක් පැනගන්න සමත් වෙනවා.

දැන් මේ හතර දෙනා ඉන්නේ සතුරු සීමාව ඇතුලේ, කිසිම සම්බන්ධයක් නැතුව තනි වෙලා. මෙයාලා ළඟ තියෙන්නේ එක රයිෆල් එකක් විතරයි. ඔහොම හැංගිලා ඉන්නකොට මෙයාලට හම්බවෙනවා කඩා වැටුනු ප්ලේන් එකක හිටපු බ්‍රිතාන්‍ය ගුවන් නියමුවෙක්ව. එයා ළඟ යුද්ධෙට හරිම වැදගත් රහස් තොරතුරු වගයක් තියෙනවා.

දැන් මේ පොඩි කණ්ඩායමේ ටාගට් එක තමයි කොහොම හරි ජර්මානු සෙබළුන්ගෙන් බේරිලා, මේ තොරතුරුත් අරගෙන ආයේ තමන්ගේ හමුදාව ඉන්න පැත්තට පැනගන්න එක. මේක නිකන්ම වෙඩි තියාගන්න යුද්ධ ෆිල්ම් එකක් නෙවෙයි. මේකේ ප්‍රධාන චරිතයක් ඉන්නවා “ඩීකන්” කියලා. එයාට ආගමික විශ්වාස සහ පරණ මතකයන් නිසා ආයේ කාටවත් වෙඩි තියන්න බැරි ලොකු මානසික අරගලයක ඉන්නේ.

ඉතින් මේ වගේ මානසික ගැටුම් මැද්දේ, කන්න බොන්න මුකුත් නැතුව, දරුණු හිම කුණාටු සහ සතුරන්ගෙන් බේරිලා මෙයාලට පණ පිටින් ගෙදර යන්න පුළුවන් වෙයිද? ඒක දැනගන්න නම් මේ ෆිල්ම් එක බලන්නම වෙනවා. අන්තිම වෙනකම් කුතුහලයෙන් බලන්න පුළුවන්, හොඳ කතාවක්.