ඔන්න අද මම ගෙනාවේ Star Wars විශ්වයේ සිද්ධ වුණු තවත් අපූරු කතාවක් ගැන විස්තරයක්. මේක තමයි “Star Wars: The Clone Wars (2008)”. ඇත්තටම මේක ඇනිමේෂන් චිත්‍රපටයක් වුනාට, ස්ටාර් වෝර්ස් කතා මාලාවට ආස අයට මඟ හරින්නම බැරි නිර්මාණයක්.

මේක අධ්‍යක්ෂණය කළේ ඩේව් ෆිලෝනි (Dave Filoni) විසින්. හඬ දායකත්වය ගැන බැලුවොත් මැට් ලැන්ටර් (ඇනකින්), ඈෂ්ලි එක්ස්ටයින් (අසෝකා) සහ ජේම්ස් ආර්නෝල්ඩ් ටේලර් (ඔබි-වන්) වගේ පිරිසක් තමයි චරිතවලට පණ දුන්නේ.

මුළු මන්දාකිණියම ගිනි ගත්ත යුද්ධයක පැටලිලා ඉන්න වෙලාවක් මේක. ජනරජයේ හමුදාවයි, සෙපරටිස්ට් (Separatist) හමුදාවයි දරුණු සටනක ඉන්නේ. ඔන්න ඔය අස්සේ අපරාධ ලෝකයේ ලොක්කෙක් වෙන “ජැබා ද හට්” ගේ පොඩි පුතාව කවුරුහරි පැහැර ගන්නවා.

දැන් වැඩේ තියෙන්නේ, යුද්ධය දිනන්න නම් ජනරජයට ජැබාගේ උදව් ඕන කරනවා. ඉතින් මේ පොඩි එකාව බේරගන්න වගකීම පැවරෙන්නේ ජෙඩායි නයිට්වරුන්ට. ඇනකින් ස්කයිවෝකර්ටයි, ඔබි-වන් කෙලෝබිටයි තමයි මේ භයානක මෙහෙයුම බාරගන්න වෙන්නේ.

මෙතනදි තමයි හොඳම හරිය පටන් ගන්නේ… ඇනකින්ට මේ ගමනට අලුත් සහායකයෙක් හම්බෙනවා. එයා නමින් “අසෝකා ටානෝ”. ඇනකින් කියන්නේ තනියම වැඩ කරන්න කැමති කෙනෙක් නිසා, මුලදි එයා මේ අලුත් ගෝලයව ප්‍රතික්ෂේප කරනවා. ඒත් හතුරෝ පිරුණු භයානක ග්‍රහලෝකයක, පොඩි හට් පැටියෙක්ව කරේ තියාගෙන බේරෙන එක ලේසි නෑ.

මේ අතරේ දුෂ්ට කවුන්ට් ඩූකුයි එයාගේ ගෝලයයි ලොකු උගුලක් අටවනවා. එයාලා හදන්නේ මේ ළමයිව පැහැර ගත්තේ ජෙඩායිලමයි කියලා ඔප්පු කරලා, ජැබාව ජෙඩායිලට විරුද්ධ කරන්න.

ඇනකින්ට තමන්ගේ අලුත් ගෝලයා එක්ක එකතු වෙලා මේ අභියෝගය ජයගන්න පුළුවන් වෙයිද?

ජෙඩායිලා මේ උගුලෙන් බේරිලා ජැබාගේ විශ්වාසය දිනා ගනීවිද?
කුතුහලය පිරුණු, ක්‍රියාදාම ගොඩක් තියෙන මේ ෆිල්ම් එක ස්ටාර් වෝර්ස් බලපු නැති කෙනෙක්ට වුනත් ආසාවෙන් බලන්න පුළුවන්.