මේක නිකන්ම නිකන් ‘ටීන්’ (teen) ෆිල්ම් එකක් නෙවෙයි. මේක ඊට වඩා ගොඩක් අඳුරු, ටිකක් හිත පාරන පැත්තකට යන කතාවක්.

කතාවේ ඉන්නේ හොඳම යාලුවෝ දෙන්නෙක්. සෑක් (Zach) සහ ජොෂ් (Josh). මෙයාලා කියන්නේ පොඩි කාලේ ඉඳන්ම එකට ඉන්න, වෙන් කරන්න බැරි යාළුවෝ. ඉතින් මෙයාලා පාසල් යනවා, බයිසිකල් පදිනවා, කෙල්ලො ගැන කතා කරනවා, නිකන් ඉන්න වෙලාවට විකාර වැඩ කරනවා. හරිම සාමාන්‍ය ජීවිතයක්.

හැබැයි, එක දවසක මේ යාලුවෝ සෙට් එක තවත් ළමයෙක් එක්ක එකතු වෙලා පොඩි වැඩක් කරනවා. ඒ වෙලාවේ, කවුරුවත් හීනෙකින්වත් නොහිතපු, මාරම බිහිසුණු “අනතුරක්” සිද්ධ වෙනවා. වැදගත්ම දේ, මේක හිතාමතා කරපු දෙයක් නෙවෙයි. ඒත් ඒකෙන් වෙන දේ භයානකයි.

මෙන්න මේ සිද්ධියෙන් පස්සේ තමයි කතාවේ නියම “Dark Times” (අඳුරු කාලය) පටන් ගන්නේ. ළමයි දෙන්නා හොඳටම බය වෙනවා. එයාලා තීරණයක් ගන්නවා මේ වෙච්ච දේ සම්පූර්ණයෙන්ම හංගන්න.

ඒත් එහෙම රහසක් හංගගෙන ඉන්න එක ලේසි නැහැ. මේ දරුණු සිදුවීම එයාලගේ ඔළුවලට වද දෙන්න පටන් ගන්නවා. වරදකාරී හැඟීම, බය සහ සැකය (paranoia) එයාලව හෙමින් හෙමින් කනවා.

ටික දවසක් යද්දී, සෑක්ට තේරෙනවා එයාගේ හොඳම යාලුවා, ජොෂ්, එයා දන්න කෙනා නෙවෙයි කියලා. ජොෂ්ගේ හැසිරීම හිතාගන්න බැරි විදිහට අමුතු, දරුණු පැත්තකට හැරෙනවා. මේ හංගපු රහස, එයාලගේ යාළුකමයි ජීවිතයි දෙකම කොයිතරම් දුරට විනාශ කරයිද කියලයි කතාව යන්නේ.