“The Canterville Ghost” (2023) ෆිල්ම් එක කතාව පටන් ගන්නේ ඇමරිකාවේ ඉන්න ‘ඔටිස්’ (Otis) කියලා පවුලක්, එංගලන්තයේ තියෙන ‘කැන්ටවිල් චේස්’ (Canterville Chase) නමින් ප්‍රසිද්ධ, ගොඩක් පරණ මන්දිරයක් මිලදී අරගෙන එහෙ පදිංචියට එන තැනින්. ඒ මන්දිරය ගන්නකොටම මිනිස්සු අනතුරු අඟවනවා එතන හොල්මනක් ඉන්නවා කියලා. ඒත් මේ මොඩර්න් පවුල ඕවා ගණන් ගන්නේ නැහැ.

හැබැයි ඉතින්, ඒ මන්දිරයේ ඇත්තටම හොල්මනක් ඉන්නවා. එයා තමයි සර් සයිමන් ද කැන්ටවිල්. එයා අවුරුදු 300ක් තිස්සේ එයාගේ මන්දිරයට එන හැම කෙනෙක්වම බය කරලා පන්නලා දාලා තියෙන්නේ. එයා හිතන්නේ මේ අලුත් ඇමරිකානු පවුලවත් සුපුරුදු විදිහට ලේසියෙන්ම බය කරලා එළවගන්න පුළුවන් වෙයි කියලා.

ඒත් වැඩේ වෙන්නේ අනිත් පැත්ත. මේ පවුලේ අයට, විශේෂයෙන්ම ඒ පවුලේ දුව ‘වර්ජිනියා’ට (Virginia) සර් සයිමන්ව දැක්කම බයක් දැනෙනවා වෙනුවට, එයාලා හොල්මනට විහිළු කරන්න, එයාව අපහසුතාවයට පත් කරන්න ගන්නවා. අවුරුදු 300ක් මිනිස්සු බය කරපු සර් සයිමන්ට හිතාගන්න බෑ මොකද වුණේ කියලා.

පස්සේ, වර්ජිනියා මේ දුකින් ඉන්න හොල්මනත් එක්ක ටිකක් යාළු වෙනවා. එතකොට තමයි එයා දන්නේ සර් සයිමන් නිකම්ම හොල්මනක් නෙවෙයි, එයා දරුණු ශාපයකට අහුවෙලා ඉන්නේ කියලා. එයාට ඒ ශාපයෙන් මිදෙන්න වර්ජිනියාගේ උදව්ව ඕනේ වෙනවා. ඉතින්, වර්ජිනියාට මේ අවුරුදු 300ක් පරණ හොල්මනගේ ශාපය කඩන්න උදව් කරන්න පුළුවන් වෙයිද?

මේ චිත්‍රපටය අධ්‍යක්ෂණය කරලා තියෙන්නේ කිම් බර්ඩන් (Kim Burdon). ප්‍රධාන චරිත වෙන සර් සයිමන්ට ස්ටීවන් ෆ්‍රයි (Stephen Fry) සහ වර්ජිනියාට එමිලි කේරි (Emily Carey) තමයි හඬ කවන්නේ.