අපි සාමාන්‍යයෙන් දකින්නේ හොල්මන් චිත්‍රපටවල ඉන්න අමනුෂ්‍යයෝ මිනිස්සුන්ව බය කරන එකනේ. හැබැයි The Dark (2018) කියන්නේ ඒ සම්ප්‍රදායෙන් සම්පූර්ණයෙන්ම බැහැර වුණු, හදවතටත් දැනෙන වෙනස්ම විදියේ “Horror” චිත්‍රපටයක්. කතාවේ ඉන්නේ මීනා කියලා මැරුණු තරුණ ගැහැණු ළමයෙක්. ඇය ජීවත් වෙන්නේ තමන්ව මරා දාපු ඒ වනාන්තරයේමයි. ඒ වනාන්තරයට ඇතුළු වෙන ඕනෑම කෙනෙක්ව ඇය අමානුෂික විදිහට මරා දානවා.

හැබැයි දවසක් මීනාට මුණගැහෙනවා ඇලෙක්ස් කියලා අන්ධ පිරිමි ළමයෙක්ව. ඇලෙක්ස්ව කවුරුහරි පැහැරගෙන ඇවිත් මේ වනාන්තරයේ හංගලා තියෙන්නේ. සාමාන්‍යයෙන් කවුරු මුණගැසුණත් මරා දාන මීනා, මේ අසරණ අන්ධ පිරිමි ළමයාව මරා දාන්නේ නැහැ. ඒ වෙනුවට මේ දෙන්නා අතර අමුතුම විදියේ බැඳීමක් ඇති වෙනවා. ඇයි මීනා මෙහෙම වුණේ? ඇයට මේ පිරිමි ළමයා ගැන අනුකම්පාවක් ඇති වුණේ ඇයි?

මේ දෙන්නටම තියෙන්නේ ඉතාමත් අඳුරු සහ වේදනාකාරී අතීතයක්. ඒ අතීතය මේ දෙන්නව එකතු කරනවා. මේක නිකම්ම බය හිතෙන චිත්‍රපටයක් විතරක් නෙවෙයි, මිනිස්සුන්ගේ කෲරත්වය සහ ඒ නිසා ඇතිවන මානසික කම්පනය (Trauma) ගැන ලස්සනට කතා කරන නිර්මාණයක්. අවසානයේ මේ දෙන්නා තමන්ගේ අඳුරු ලෝකයෙන් මිදෙන්න උත්සාහ කරන්නේ කොහොමද කියන එක ඔබම බලලා දැනගන්න. මේ චිත්‍රපටය නරඹනකොට ඔබට බය වගේම ලොකු දුකකුත් දැනේවි.