මේක පටන් ගන්නේ ලිස්බෙත් සලාන්ඩර් (Lisbeth Salander), එයාගේ අමුතු ජීවිතේ දිගටම ගෙනියන තැනින්. එයා රටෙන් පිට ඉඳලා ආපහු ස්වීඩනයට එනවා. අර පළවෙනි චිත්‍රපටියේ හිටපු පරීක්ෂණ පත්තරකාරයා, මිකායෙල් බ්ලොම්ක්විස්ට් (Mikael Blomkvist), එයාගේ ‘මිලේනියම්’ (Millennium) සඟරාවට ලිංගික ජාවාරම් ජාලයක් ගැන විශාල තොරතුරු රැගත් ලිපියක් සකස් කරනවා. මේක පිටුපස ඉන්නවා ස්වීඩනයේ ඉහළ පෙළේ පුද්ගලයින්.

හැබැයි, ඔය ලිපිය එළි වෙන්න කලින්, ඒ පරීක්ෂණේට සම්බන්ධ තරුණ පත්‍රකලා ශිල්පියෙකුයි එයාගේ ගැහැණු ළමයයි මරා දාලා තියෙනවා. ඒ වගේම, ලිස්බෙත්ගේ අතීතයේ හිටපු අප්‍රසන්න භාරකරුවාවත් මරලා දාලා.

වැදගත්ම දේ තමයි, මේ මිනීමැරුම් වලට පාවිච්චි කරපු තුවක්කුවේ ඇඟිලි සලකුණු තියෙන්නේ වෙන කාගේවත් නෙවෙයි… ලිස්බෙත් සලාන්ඩර්ගේ!
දැන් ලිස්බෙත් තමයි පොලීසියේ ප්‍රධාන සැකකාරිය. මුළු රටේම අවධානය එයාට. හැමෝම එයා සොයාගෙන යනකොට, මිකායෙල් විතරයි විශ්වාස කරන්නේ එයා මේ දේවල් කළේ නැහැ කියලා.

බ්ලොම්ක්විස්ට් රහසේම ලිස්බෙත්ව හොයන අතරේ, එයාට තේරෙනවා මේ ලිංගික ජාවාරම් කතාවයි, ලිස්බෙත්ගේ අඳුරු අතීතයයි අතර ලොකු සම්බන්ධයක් තියෙනවා කියලා. මේ සිදුවීම් පිටුපස ඉන්නේ කවුද? ලිස්බෙත්ට මේකෙන් ගැලවෙන්න පුළුවන් වෙයිද? මේ හැමදේම එයාගේ පෞද්ගලික පළිගැනීමක් දක්වා දුරදිග යයිද?