මේක තියෙන්නේ නිකන්ම නිකන් පර්ෆෙක්ට් ලෝකයක. මෙහේ කිසිම වේදනාවක්, යුද්ධයක්, දුකක්, බයක් නෑ. හැමදේම හරිම පිළිවෙළයි. ඒත් එක්කම… පාටවල් නෑ, සංගීතයක් නෑ, ආදරය කියන හැඟීමවත් නෑ. හැමෝම එක වගේ. හැමදේම පාලනය කරලයි තියෙන්නේ.

කතාවේ ඉන්නේ ජෝනස් කියලා තරුණ කොල්ලෙක්. එයාගේ ලෝකේ, ළමයින්ට එයාලගේ ජීවිත කාලෙටම අදාළ රස්සාව දෙන ලොකු දවසක් එනවා. හැමෝටම සාමාන්‍ය ජොබ් ලැබෙද්දී, ජෝනස්ට ලැබෙන්නේ හරිම විශේෂ, අමුතුම පත්වීමක්. ඒ තමයි “මතකයන් ලබන්නා” (Receiver of Memory).

ජෝනස්ට ට්‍රේනින් දෙන්න ඉන්නේ මේ ජොබ් එක කලින් කරපු වයසක කෙනෙක්. එයා තමයි “මතකයන් දෙන්නා” (The Giver). මෙන්න මෙතන ඉඳන් තමයි ජෝනස්ගේ මුළු ලෝකෙම කණපිට හැරෙන්නේ.

මේ “ද ගිවර්” පටන් ගන්නවා ජෝනස්ට මතකයන් දෙන්න. ඒත් මේවා නිකන් මතකයන් නෙවෙයි. මේ එයාලගේ “පර්ෆෙක්ට්” ලෝකෙ හැදෙන්න කලින් තිබ්බ පරණ ලෝකේ මතකයන්. ජෝනස් පළවෙනි වතාවට ‘පාට’ දකිනවා. ‘සංගීතය’ අහනවා. ‘ආදරය’ කියන්නේ මොකක්ද කියලා එයාට දැනෙනවා.

ඒත් ඒ සතුට විතරක් නෙවෙයි. ඒත් එක්කම වේදනාව, බය, යුද්ධය කියන දේවලුත් එයාට දැනෙන්න ගන්නවා. එයාගේ සමාජය හංගලා තිබ්බ හැමදේම එයා දැන් දන්නවා.

ජෝනස් තේරුම් ගන්නවා එයාලා ජීවත් වෙන මේ ලස්සන ලෝකේ ඇත්තටම ලොකු බොරුවක් කියලා. ආරක්ෂාව වෙනුවෙන් එයාලට මනුස්සකම නැතිවෙලා කියලා. දැන් ජෝනස්ට ඕනේ මේ ඇත්ත අනිත් අයටත් දෙන්න. ඒත් ඒක ලේසි නෑ, ඒක හරිම භයානකයි. එයා ඒ අවදානම ගනියිද? පාලකයෝ එයාට ඒ දේ කරන්න දෙයිද?