ඔයාලා “Lord of the Rings” (LOTR) චිත්‍රපට මාලාවට ආදරේ කරන කෙනෙක් නම්, මේ චිත්‍රපටය මඟහරින්නම එපා. මේක ඇත්තටම “Fan film” එකක් වුණාට, මෙහි තියෙන තාක්ෂණික මට්ටම සහ රංගනය හොලිවුඩ් මට්ටමේම තියෙනවා. කතාව සිද්ධ වෙන්නේ “The Fellowship of the Ring” චිත්‍රපටයේ සිදුවීම්වලට ටික කාලයකට කලින්. ගොලම් (Gollum) ගාව තිබුණ ඒ බලගතු මුදුව නැති වුණාට පස්සේ, ඔහුව හොයාගෙන යන අන්තරායකර ගමන ගැන තමයි මෙහි තියෙන්නේ.

මෙහි ප්‍රධාන චරිතය වෙන්නේ “ඇරගෝන්” (Aragorn). ගෑන්ඩල්ෆ්ගේ (Gandalf) උපදෙස් මත ඇරගෝන් උත්සාහ කරන්නේ සෝරෝන්ගේ (Sauron) සේනාවට කලින් ගොලම්ව අල්ලගන්න. මොකද ගොලම් දන්නවා මුදුව තියෙන්නේ කොහේද කියලා. ඉතින් ඇරගෝන්ට සිද්ධ වෙනවා වනාන්තර, කඳු හෙල් මැදින් ඉතාම අසීරු ගමනක් යන්න. මේ ගමන අතරතුර ඔහුට මුණගැහෙන හතුරෝ සහ මුහුණ දෙන්න වෙන අනතුරු නිසා කතාව පුරාම ලොකු කුතුහලයක් රැඳිලා තියෙනවා.

ඔබ මැද-පෘථිවියේ (Middle-earth) අසිරියට සහ LOTR ලෝකයට කැමති නම්, ගොලම්ව හොයාගෙන යන මේ දඩයම අනිවාර්යයෙන්ම බලන්න. ඉතාම අඩු පිරිවැයකින් හැදුවත්, මෙහි දර්ශන තල සහ වේශ නිරූපණයන් ඇත්තටම විශ්මිතයි. ඇරගෝන් මේ මෙහෙයුම සාර්ථකව නිම කරයිද? ගොලම්ව ඔහුට මුණගැහෙයිද? ඒ ප්‍රශ්නවලට උත්තර හොයන්න නම් “The Hunt for Gollum” බලන්නම වෙනවා. විශේෂයෙන්ම LOTR රසිකයෙක්ට මේක අතපසු කරන්න බැරි අත්දැකීමක්.