‘The Invasion’ (2007) කියන්නේ බලන් ඉන්නකොට ඇඟ හිරිවැටෙන වර්ගයේ සයන්ස් ෆික්ෂන් (Sci-Fi) ත්‍රිලර් එකක්. මේකේ ප්‍රධාන චරිත කරන්නේ නිකොල් කිඩ්මන් (Nicole Kidman) සහ ඩැනියෙල් ක්‍රේග් (Daniel Craig). අධ්‍යක්ෂණය ඔලිවර් හර්ෂ්බීගල් (Oliver Hirschbiegel) ගෙන්.

හිතන්නකෝ, අභ්‍යවකාශ යානයක් කඩාවැටිලා, ඒකත් එක්ක හරි අමුතු, පිටසක්වල ජීවී අංශු වගයක් පොළොවට එනවා. මිනිස්සුන්ට මේක ආසාදනය වෙන්න පටන් ගන්නවා. හැබැයි මේක නිකම් ලෙඩක් නෙවෙයි.

මේක ඇඟට ගියාම, මිනිස්සු නින්දට ගියාම… එයාලා ආයෙ නැගිටින්නේ එයාලා විදියට නෙවෙයි.

නිකොල් කිඩ්මන් (දොස්තර කැරොල්) ට ටිකෙන් ටික තේරෙනවා එයා වටේ ඉන්න මිනිස්සු, එයා දන්න කියන අය, එයාගේ හිටපු මහත්තයා පවා, හරි අමුතු විදියට හැසිරෙනවා කියලා. එයාලගේ කිසිම හැඟීමක් පේන්න නෑ, හරියට රොබෝලා වගේ. හැමෝම එකම විදියට හිතනවා, එකම විදියට වැඩ කරනවා.

මේ පිටසක්වල ආක්‍රමණය ලෝකෙම වෙලාගනිද්දී, කැරොල්ට තියෙන ලොකුම අභියෝගය තමයි තමන්ගේ පුතාව (ඔලිවර්) බේරගන්න එක. හැබැයි ප්‍රශ්නේ තියෙන්නේ, හැමෝම ‘වෙනස්’ වෙලා ඉන්න ලෝකෙක, එයාට තමන්ගේ පුතාව බේරගන්න නම් එක තත්පරයක්වත් නිදාගන්න බෑ. එයාට නින්ද නොයා කොච්චර වෙලා ඉන්න පුළුවන් වෙයිද? එයාට පුතාව බේරගන්න පුළුවන් වෙයිද?