Sci-Fi Dystopian Thriller ගණයේ සුපිරිම වැඩක් තමයි The Mill (2023) කියන්නේ. මේ කතාව පටන් ගන්නේ හිතාගන්න බැරි විදියේ අමුතු තැනකින්. ජෝ කියන්නේ ඉතාමත් දක්ෂ, තමන්ගේ රක්ෂාව උපරිමයෙන්ම කරන ආයතනික සේවකයෙක්. හැබැයි එක දවසක් එයා ඇහැරෙද්දී එයා ඉන්නේ එයා දන්න කියන තැනක නෙවෙයි. කිසිම ජනේලයක් නැති, හතරැස් කොන්ක්‍රීට් කාමරයක් ඇතුලේ. ඒ කාමරය මැද තියෙනවා පරණ පන්නයේ විශාල ඇඹරුම් ගලක් (Mill).

ජෝට තේරෙන්නේ නැහැ එයා මෙතනට ආවේ කොහොමද, කවුද එයාව මෙතන හිර කලේ කියලා. හැබැයි ඉක්මනටම එයාට අණ දෙන අද්භූත කටහඬක් ඇහෙන්න ගන්නවා. ඒ අණට අනුව ජෝට බේරිලා ඉන්න ඕනෙ නම් හැමදාම ඒ බර ඇඹරුම් ගල කරකවන්න ඕනේ. දවසකට කරන්න ඕනෙ වැඩ කොටසක් තියෙනවා, ඒක නොකලොත් දඬුවම මරණයයි. කාමරයෙන් එහා පැත්තේ ඉන්න අනිත් සිරකරුවන්ගේ කටහඬවල් ඇහුණත්, කාටවත් කාවවත් පේන්නේ නැහැ.

මේක නිකන්ම නිකන් හිරවීමක් විතරක් නෙවෙයි. මේක මිනිස් ශ්‍රමය උපරිමයෙන් සූරාකන, නූතන වහල් ක්‍රමයක සහ කපටි පද්ධතියක (System) අඳුරු පැතිකඩක්. තමන්ගේ බිරිඳ සහ ඉපදෙන්න ඉන්න දරුවා වෙනුවෙන් ජෝ මේ අමානුෂික වධහිංසාවට ඔරොත්තු දෙන්න උත්සාහ කරනවා. හැබැයි එයාට මේ නපුරු පද්ධතිය පරද්දලා නිදහස් වෙන්න පුළුවන් වෙයිද? මනෝවිද්‍යාත්මකව මිනිසාව ඇද වට්ටන හැටි පෙන්වන The Mill චිත්‍රපටය, ඔයාලව මොහොතකට ගල් ගන්වනවා නිසැකයි.