අධ්‍යක්ෂණය: ඩෙසිරේ අකවාන් (Desiree Akhavan) ප්‍රධාන නළු නිළියන්: ක්ලෝයි ග්‍රේස් මොරෙට්ස් (කැමරන් ලෙස), සාෂා ලේන්, ෆොරස්ට් ගුඩ්ලක්.

මේ කතාව යන්නේ 90 දශකයේ මුල් භාගයේ. කැමරන් පෝස්ට් කියන්නේ පාසල් යන සාමාන්‍ය කෙල්ලෙක්. හැබැයි එයාට ලොකු රහසක් තියෙනවා. එයා කැමති පිරිමි ළමයින්ට නෙවෙයි, තමන්ගේම පන්තියේ ඉන්න තවත් ගැහැණු ළමයෙක්ට. දවසක් පාසල් නිවාඩුව දවසේ රෑක මේ දෙන්නා කාටත් හොරා තමන්ගේ ලෝකෙක තනිවෙලා ඉන්නකොට, කැමරන්ගේ පෙම්වතාට (එයා බොරුවට ආශ්‍රය කරන පිරිමි ළමයාට) මේක අතේ මාට්ටු වෙනවා.

මේ සිද්ධියත් එක්ක කැමරන්ගේ ගෙදර අය කලබල වෙනවා. එයාලා හිතන්නේ මේක “සුව කළ යුතු ලෙඩක්” කියලා. ඉතින් එයාලා කැමරන්ව යවනවා “God’s Promise” කියලා පල්ලියක් මගින් පවත්වාගෙන යන විශේෂ කඳවුරකට. මේ කඳවුරේ අරමුණ තමා සමලිංගික දරුවන්ව ආපහු “සාමාන්‍ය” තත්ත්වයට ගන්න එක. එහෙම නැත්නම් එයාලගේ හිත් වෙනස් කරන එක.

මේ කඳවුර ඇතුලේ සිද්ධ වෙන්නේ මාරම දේවල්. එතන ඉන්න අනිත් ළමයිනුත් කැමරන් වගේම තම තමන්ගේ අනන්‍යතාවය හොයාගන්න බැරුව අතරමං වුණු අය. සමහරු මේකට බයේ ඉන්නවා, සමහරු බොරුවට රඟපානවා. කැමරන්ට එතනදී අලුත් යාළුවෝ දෙන්නෙක් හම්බවෙනවා, ජේන් සහ ඇඩම් කියලා. මේ තුන්දෙනා එකතු වෙලා මේ අමුතු නීති රීතිවලට මුහුණ දෙන හැටි සහ තමන් ඇත්තටම කවුද කියලා තේරුම් ගන්න උත්සාහ කරන හැටි තමා චිත්‍රපටයේ ගලාගෙන යන්නේ.

මේ කඳවුරෙන් එයාලට බේරෙන්න පුළුවන් වෙයිද? නැත්නම් සමාජය කියන විදියට එයාලා වෙනස් වෙයිද? ඒක දැනගන්න නම් ෆිල්ම් එක බලන්නම වෙනවා.