ඔයාලා ඓතිහාසික කතා බලන්න කැමති නම් “The Physician” කියන්නේ මැණිකක් වගේ ෆිල්ම් එකක්. මේකෙන් කියවෙන්නේ 11 වෙනි සියවසේ ජීවත් වුණ රොබ් කෝල් කියන තරුණයා ගැන. රොබ්ගේ අම්මා අභිරහස් අසනීපයකින් මිය යනවා. ඒ කාලේ එංගලන්තයේ වෛද්‍ය විද්‍යාව කොච්චර දුර්වලද කියනවා නම්, මිනිස්සු මැරෙන්නේ ඇයි කියලවත් කවුරුත් දැනගෙන හිටියේ නැහැ. තමන්ගේ අම්මා බේරාගන්න බැරි වුණ එක ගැන රොබ් ඉන්නේ ලොකු දුකකින්.

රොබ් තීරණය කරනවා ලෝකයේ හොඳම වෛද්‍ය විද්‍යාව ඉගෙන ගන්න. එයා දැනගන්නවා පර්සියාවේ (දැන් ඉරානය) ඉන්නවා කියලා ලෝකයේ දක්ෂම වෛද්‍යවරයා වන ඉබන් සිනා. හැැබැයි ඒ කාලේ ක්‍රිස්තියානි අයට පර්සියාවට ඇතුළු වෙන්න අවසර තිබුණේ නැහැ. ඉතින් රොබ් තමන්ගේ අනන්‍යතාවය හංගලා, යුදෙව් ජාතිකයෙක් වගේ වෙස්වලාගෙන දහස් ගණන් සැතපුම් දුර මේ භයානක ගමන යන්න පටන් ගන්නවා.

මේ චිත්‍රපටිය පුරාම තියෙන්නේ රොබ් මුහුණ දෙන අභියෝග. කාන්තාර මැදින් යන ගමන, වසංගත රෝග එක්ක කරන සටන සහ ඒ කාලේ තිබුණ ආගමික මතවාද එක්ක කරන අරගලය මෙහි මැනවින් පෙන්වනවා. රොබ්ට පුළුවන් වේවිද ඉබන් සිනාගේ ශිෂ්‍යයෙක් වෙන්න? එයාගේ ඇත්ත අනන්‍යතාවය හෙළි වුණොත් මොකද වෙන්නේ? වෛද්‍ය විද්‍යාවේ ආරම්භය සහ ඒ වෙනුවෙන් මිනිස්සු කරපු කැප කිරීම් ගැන කියවෙන මේ කතාව හරිම ලස්සනට රූපගත කරලා තියෙනවා. මේක බලලා ඉවර වෙද්දී ඔයාලට ජීවිතය ගැන අමුතුම හැඟීමක් දැනේවි.