මේ චිත්‍රපටිය අධ්‍යක්ෂණය කරන්නේ Ryûhei Kitamura විසින්. ප්‍රධාන චරිත විදිහට Stephen Dorff සහ Emile Hirsch රංගනයෙන් දායක වෙනවා. Gigi Zumbado තමයි ප්‍රධාන නිළිය විදිහට ඉන්නේ.

කතා සාරාංශය: කතාව පටන් ගන්නේ මංකොල්ලයකින්. යාළුවෝ දෙන්නෙක් එකතු වෙලා පොඩි සොරකමක් කරන්න සැලසුම් කරනවා. හැබැයි වැඩේ හිතපු විදිහට සිද්ධ වෙන්නේ නෑ. එතන ලොකු කලබලයක් වෙලා මේ දෙන්නට ඉක්මනටම එතනින් පැනලා යන්න සිද්ධ වෙනවා.

පැනලා යන ගමන් ආරක්ෂාවටත් එක්ක මෙයාලා තරුණියක්ව ප්‍රාණ ඇපකාරියක් විදිහට බලෙන් වාහනේ දාගෙන යනවා. යන අතරමගදී වාහනේ කැඩෙන නිසා, රෑ ගත කරන්න තැනක් හොයද්දී මෙයාලට පාළු පැත්තක තියෙන ගොවිපළක් හම්බවෙනවා.

පොලීසියෙන් බේරෙන්න හිතාගෙන මේ ගෙදරට ගියාට, මෙයාලා දන්නේ නෑ ඊට වඩා ලොකු අනතුරක පැටලෙන්නයි යන්නේ කියලා. මොකද මේ ගෙදර අයිතිකාරයා සාමාන්‍ය කෙනෙක් නෙවෙයි. එයා දොස්තර කෙනෙක් වුණාට හරිම අද්භූත, කවුරුත් නොහිතන විදිහේ වැඩ කරන කෙනෙක්.

මේ හොරු දෙන්නා හිතාගෙන ඉන්නේ එයාලා තමයි ලොකුම චණ්ඩි කියලා. ඒත් මේ ගෙදර පහළ මහා භයානක රහසක් හැංගිලා තියෙනවා. ඇත්තටම කවුද දඩයම්කාරයා? කවුද ගොදුර? අර අහිංසක කෙල්ලට අන්තිමට මොකක් වෙයිද?