මේක අධ්‍යක්ෂණය කරලා තියෙන්නේ Joel Schumacher. ප්‍රධාන චරිතය, ඒ කියන්නේ ‘බෝස්’ (Bozz) විදිහට රඟපාන්නේ Colin Farrell. ඇත්තටම, කොලින් ෆැරල් හොලිවුඩ්වල ජනප්‍රිය වෙන්න පටන් ගත්තේ මේ චිත්‍රපටියෙන්.

කතාව වෙන්නේ 1971, වියට්නාම් යුද්ධය උපරිමයටම ගිහින් තියෙන කාලයක. කතාව පටන් ගන්නේ ඇමරිකාවේ, ලුසියානා වල තියෙන ‘ෆෝට් පෝක්’ කියන හමුදා පුහුණු කඳවුරකින්. මෙතන ඉන්නේ වියට්නාමයට යවන්න කලින් දෙන අන්තිම, දරුණුම පාබල පුහුණුව (Advanced Infantry Training) ලබන තරුණ සොල්දාදුවෝ සෙට් එකක්.

මේ හැමෝම අතරේ, ‘රෝලන්ඩ් බෝස්’ (Roland Bozz) කියන්නේ මාරම වෙනස් චරිතයක්. එයා යුද්ධයට සම්පූර්ණයෙන්ම විරුද්ධයි. එයා ඉන්නේ හමුදාවට බලෙන් බඳවගත්ත කෙනෙක් (draftee). බෝස්ගේ එකම අරමුණ කොහොමහරි කරලා මේකෙන් අයින් වෙලා ගෙදර යන එක.

එයා හරිම බුද්ධිමත්, ඒ වගේම හරිම මුරණ්ඩුයි. එයා හමුදාවේ නීති-රීති ගණන් ගන්නේ නෑ. ඒ විතරක් නෙවෙයි, එයා හමුදාවේ තියෙන ‘ලූපහෝල්ස්’ (loopholes) පාවිච්චි කරලා, ගෙදර යන්න ඕන අනිත් සොල්දාදුවන්ටත් හොරෙන්ම උදව් කරනවා.

මේ නිසා බෝස්, එයාගේ උසස් නිලධාරීන් එක්ක වගේම, එයාගේම සෙට් එකේ ඉන්න සමහර සොල්දාදුවෝ එක්කත් නිතරම ප්‍රශ්න ඇති කරගන්නවා.

මේ කඳවුරේ අන්තිම ටෙස්ට් එක තමයි “ටයිගර්ලන්ඩ්”. මේක කියන්නේ, වියට්නාම් කැලෑවක පරිසරයම කෘත්‍රිමව හදපු, දරුණුම පුහුණුව දෙන තැනක්. මේක තමයි එයාලගේ අන්තිම විභාගය.

මේ යුද්ධයට යන්න කොහෙත්ම කැමති නැති බෝස්, මේ ‘ටයිගර්ලන්ඩ්’ එක ඇතුළේ මොනවා කරයිද? එයා අනිත් අයටත් උදව් කරලා, තමන්ගේ ප්ලෑන් එක සාර්ථක කරගනීද? නැත්නම් එයාවත් අනිත් අය වගේම යුද්ධෙට යවයිද?