කොරියානු යුද්ධය කියන්නේ ලෝක ඉතිහාසයේ ඉතාමත් දරුණු කාලපරිච්ඡේදයක්. හැබැයි මේ චිත්‍රපටය ඒ දරුණුකම මැදින් අමුතුම මානුෂීය කතාවක් අරන් එනවා. කතාව පටන් ගන්නේ උතුරු සහ දකුණු කොරියානු සොල්දාදුවන් පිරිසක් වගේම, ඇමරිකානු නියමුවෙකුත් අහම්බෙන් එකම ගමකට එකතු වීමෙන්. මේ ගම තමයි “දොන්මැක්ගෝල්”.

මේ ගමේ තියෙන විශේෂත්වය තමයි, එහි ඉන්න මිනිස්සු පිටත ලෝකයේ මොන වගේ යුද්ධයක් සිද්ධ වෙනවද කියලා දන්නේවත් නැතිකම. හරියට ලෝකයෙන් වෙන්වුණු සුරපුරයක් වගේ. එකිනෙකා මරාගන්න මාන බලන හතුරෝ ටිකක් මේ වගේ අහිංසක මිනිස්සු ඉන්න ගමකට වැටුණම මොනවා වෙයිද? තමන්ගේ අතේ තියෙන තුවක්කු, බෝම්බ මේ මිනිස්සුන්ගේ අවිහිංසක හිනාව ඉස්සරහා පාවිච්චි කරන්න ඔවුන්ට පුළුවන් වෙයිද?

යුද්ධයේ කටුක බව සහ මිනිස්කමේ සුන්දරත්වය අතර තියෙන ගැටුම හරිම ලස්සනට, සමහර තැන්වලදී හිනා යන විදිහටත්, තවත් තැන්වලදී ඇසට කඳුළු එන විදිහටත් මේ නිර්මාණයෙන් ඉදිරිපත් කරලා තියෙනවා. අවසානයේදී මේ සොල්දාදුවන් මේ ලස්සන ගම්මානය බේරගන්න මොන වගේ තීරණයක් ගනීවිද කියන එක තමයි කුතුහලය. ඔබ යුධ චිත්‍රපටවලට ආදරය කරන කෙනෙක් නම්, මෙය මග නොහැරිය යුතුම එකක්.